යසිත්ගේ පියාඹන පුඩිම...

මට සතියෙ දවසක හවස ගෙදර ඉන්න ලැබෙන්නෙ කලාතුරකින්. ලෙක්චර්ස් තියෙන දවසට ගෙදර එනකොට 7ත් පහු වෙනව. ඉතිං ඔහොම චාන්ස් එකක් ලැබුණම ඒකෙ උපරිම ඵල නෙලා ගන්න එපැයි. ඔය දවසට ඉතිං හවස 3 ඉඳන් 7 වෙනකම් TV එක ඉස්සරහ තමයි. ඇයි සිරසෙ කාටුන් බලන්න

ඒකට ඉතිං ලොකු පොඩි කියල වෙනසක් නෑනේ.. (කොහොමත් මං පොඩි එකානෙ) ඕවයින් මං බලන්නම ආස සෙට් එක තමයි පින්ක් පැන්තර්, ගාෆීල් , කවුද බෝයි, ගිරිපුර ඇත්තෝ තව අර චණ්ඩී කියල ගොං ආතල් එකක් තියෙනව ඒක නම් බලන්නෙ නෑ. ඔය සෙට් එකෙන් පස්සෙ සජානා නංඟී කරන රට හිනා බලනව (එකට ක්ලාස් ගියපු කෙල්ලොනේ, දැන් උන් කොහෙද අපි කොහෙද)

හරි ඔන්න කතාවෙන් පිට පැන්නනේ.. දැං ගිය සිකුරාද හවසත් මං මගේ අකමැතිම සතා ඉන්න කාටූන් එක බැළුවා. (ඔව් ඔව්. බතල පූසො මට පේන්න බෑ) ඒ උනාට ඔය කාටූන් එක නම් හරි ආසාවෙන් බලනව හඬකැවීම් ශිල්පීන්ගෙ දක්ෂකමට පිං සිද්ධ වෙන්න.
ඉතිං එදා හවස මගේ මවුතොමෝ තරමක අසනීප තත්වයෙන් පසු උන නිසා 4ට විතර පියතෙමේ එක්ක ආරෝග්‍යශාලාවකට ගියා. යද්දි මට වැඩ කීපයක් පැවරුවද කොහෙද. කාටද අෆ්ෆා ඕව ඇහෙන්නෙ මේව බලද්දි.. හැබැයි පුඩිමක් හදනව ඒක වෙලාවට බාන්න කියනව නම් ඇහුණා. (කෑමක්නේ ) මමත් හොඳ එකා වගේ "හා අම්මේ: කියල වැඩේ බාර ගත්තා. ඔය පුඩිම හැදුවෙ අර ගානට තැම්බුනාම ගමටම ඇහෙන්න හූ කියන prestige cooker එකක.

මෙන්න මේ වගේම එකක්

ඕක දැකල තිබ්බට මං උයන්න යනවැයි. ටික වෙලාවක් යද්දි මෙන්න මේ යකා මහ හයියෙන් චූස්.. හු..හූ ගන්න පටන් ගත්තා. කාටූන් එකෙත් ෆුල් ආතල් කෑල්ලක් යන්නේ. ඒක දාල යන්නත් බෑ. ඒත් මේ යකා ගමටම ඇහෙන්න කෑ ගහනවනෙ. කොහොම හරි තව ටිකක් ඉවසුවම අර පැය බාගෙන් බාගෙට දාන නිවුස් කෑල්ල පටන් ගත්තා. ඒ අවසරෙන් මං කුස්සියට රිංඟල ගෑස් ලිප ඕෆ් කරා..
ඒත් මූ තාම කෑ ගහනව. විනාඩියක් විතර බලං හිටියා... ම්ම්හු.. තාමත් එහෙමයි.

පට ගාල මගේ ටිකිරි මොලේට අදහසක් ආව. මේකා කෑ ගහන්නෙ වාෂ්ප පීඩනේ නිසානෙ. පියන ඇරල නිවෙන්න තිබුණ නම් හරිනේ.. ළඟ තිබුණ රෙදි කෑලි 2ක් අරන් ආරින්න ඇදුව. පට්ට අමාරුයි. හිර වෙලා වගේ.. (ඕකෙ කට්ටයක් වැටෙන්න ඕනනෙ අරින්නයි වහන්නයි. මං බෝතල් මූඩියක් අරිනව වගේ ගලවන්න හැදුවෙ )
ගැම්ම දාල ඇල්ලුව ආපහු. එක පාරටම චූ......ස්  ගාල පියන ඇත්තකට වීසි උනා. තව පොඩ්ඩෙන් වාෂ්ප වලට මාවත් චූ..ස් වෙනව. වෙලාවට දුරින් තියන් ඇරියෙ. එක පාරටම හිතා ගන්න බෑ මොනව උනාද කියල. තත්පර කීපයක් එහෙමම ඉඳල විසි උන පියනත් ඇහිඳන් ආපහු ආව..

හුටා.... පුඩිම නෑ

යන්තම් පතුලෙ පැණි ටිකක් තියෙනව. වෙන මුකුත්ම නෑ. දැං ඉතිං වසල හමාරයි. මං මේක තනියම කෑව කියලයි මාට්ටු වෙන්නෙ බිම වැක්කිරිලත් නෑ. එහෙනම් පැණි ගලාගෙන යන්න ඕනනෙ. මේසෙ යට, උඩ , prestige cooker එක අනිත් පැත්ත හරවලත් බැළුව නෑ.. අන්තිමට මං නිඟමනයකට ආවා.

prestige cooker එකකින් උයද්දි වෙලාවට බෑවෙ නැත්නම් ඇතුලෙ තියෙන සියළු සංඟටක වාෂ්ප බවට පත්වේ.

ඔහොම නිගමනය කරල නැඟිටින්න හදනකොටම අතට උණු පැණි බිංදුවක් වැටුණා. පැණි වගේමයි. ඒත් උඩින්නේ. අපේ ගෙදර හූණොත් මදි නොකියන්න ඉන්නව. ඒත් පැණි වගේමයි, අනික උණුයි. කෝකටත් වටේ පිටේ කවුරුවත් නැති එකේ දිව ගාල බැළුව. බඩුම තමා..පැණිම තමා. එතකොටම තව බිංදුවක්..
ෂේප් එකේ උඩ බැලූවා..

යකෝ පුඩිම සිවිලිමේ...  

ලස්සනට සුදුපාට සිවිලිමේ ගොම බෙට්ටක් ගහල වගේ තියෙනවා.. මොනව කරන්නද ෆොටෝ එකක් ගන්න විදියකුත් නෑ. මගේ ෆෝන් එක කොම්පැණියෙන් එවද්දිම camera එක Delete කරලනෙ එවල තියෙන්න

  යන්තම් මේස උඩින් තව පුටුවක් තියල සිවිලිමේ තිබුණ පුඩිම හැංදකට හූරල අර ගත්තා..

ඒක මං කෑවෙ නැද්ද කොහෙද.. මං කනවද ඔය ජරාව නේද ?

---

---

---

අළුත් අත්හදා බැලීමක් කරා. ඇත්තටම මේව හදන්නෙ ප්‍රධාන වශයෙන් මට ඒකෙන් දැනුමක් ගන්න. ඊළඟට වෙන කෙනෙක් ඒකෙන් ප්‍රයෝජනයක් ගන්නව නම් මට ඒ ඇති..
මේකයි වැඩේ.. බ්ලොග් ලියන අයට එකට එකතු වෙන්න. එකිනෙකාට පණිවිඩ දෙන්න. ප්‍රසිද්ධ නිවේදන දෙන්න ෆෝරම් එකක්. වගකීමෙන් කියනව මේක හැදුවෙ කාට හරි ප්‍රයෝජනයක් ගන්න විතරයි. වෙන කිසිම අරමුණක් නෑ. ඔයාල කැමති නම් ඒකෙන් වැඩක් ගන්න, අඩුපාඩු කියන්න. එක්කෙනෙක් හරි ප්‍රයෝජනයක් ගන්නව නම් එච්චරයි.

මේ වැනිල ෆෝරම් එක. මං Local Language File එක සිංහලෙන් ලියපු එක විතරයි කරේ.. ඔයාලට ප්‍රයෝජනයක් වෙනව කියල හිතෙනව නම් පාවිච්චි කරන්න..

ආහ්... අනිත් එක කතෝලික හා කතෝලික නොවන ඔයාලා හැමෝටම සාමය සතුට පිරි නිරෝගී මනුස්සකම රජයන සුභ නත්තලක් වේවා!