නත්තල් සීයා

පොඩි එකා බෙල්ල උස්සල වටපිට බැළුවා.. වට පිට හරිම කලබලයි. වාහන වේගෙන් යනවා. ඊට වඩා වේගෙන් මිනිස්සු යනවා. ඊටත් වඩා වේගෙන් කාලය යනවා. පොඩි එකාට මේව වැදගත් නෑ. හරි බරි ගැහිල වාඩි වෙලා හිටපු තැනින් නැඟිටල වටේ පිටේ නත්තලට සරසපු සැරසිලි දිහා ඇස් දෙකත් ලොකු කරන් බැළුවා.. හැමෝම සතුටින්..

පොඩි එකා තමන්ගෙ කෙලින්ම තිබුණ රතුපාට ගාපු පාට පාට සැරසිලි දාපු මාළිගාව දිහා බැළුවා. හරිම ලස්සනයි.. තමන් වගේම පොඩි උන් තමන්ගෙ අම්මල තාත්තල එක්ක හිනා වෙවී ඒක ඇතුලට යනවා. එයාල ආපහු එන්නෙ තෑගි ගොඩාක් පිරුණු පාර්සල් අරං. හරිම ලස්සන පාට පාට ඇඳුම් ඇඳගෙන.. පොඩි එකා ඒ දිහා බලන් හිටියා. වීදුරුවට අව්ව වැටිල පරාවර්තනේ වෙලා පොඩි එකාගෙ ඇස් රිදෙනවා. ඒත් ඒ අතරින් පොඩි එකා තමන් බලපොරොත්තු උන ඒ කෙනාව දැක්කා..

නත්තල් සීයා.. ඔව් ඒ එයා තමයි. ලස්ස්න දිග රැවුලක්. රතුපාට කබාය. හිනාව පිරුණු මුහුණ. මාළිඟාව ඇතුලට යන පොඩි උන්ට තෑගි බෙදනවා. ටොපි, චොකලට්, පුංචි පුංචි සෙල්ලම් බඩු..

"නත්තල් සීයට ඕනම දෙයක් දෙන්න පුළුවන්ලු. හ්ම්ම්ම්ම්.. මං මොනවද ඉල්ලන්නේ.. බයිසිකලයක්.. නෑ නෑ ලස්සන කාර් එකක්...... හ්ම්ම්ම්ම්ම්.. එපා එපා.. මං මගේ නංඟි පැටියව ඉල්ලන්න ඕන. අම්ම කිව්වෙ එයා දැං දිවිය ලෝකෙ කියලනෙ. මං නත්තල් සීයට කියල එයාව ගෙන්න ගන්නවා. එතකොට මට ඕන තරම් සෙල්ලම් කරන්න පුළුවන්."

පොඩි එකා තනියම හිතුවා.. දුකින් වේදනාවෙන් පදම් උන පොඩි එකාගෙ මූණට කාලෙකට පස්සෙ ලස්සන හිනාවක් ආව. පොඩි එකා හිටගෙන තමන්ගෙ වැරහැලි උන එකම ජංගි කොටේ අත් දෙකින්ම උස්සගෙන නත්තල් සීයා ගාවට දිව්වා.. නත්තල් සීයා මාලිඟාව ඇතුලෙ ඉන්නෙ. පොඩි එකාට වැඩි දුරක් යන්න ලැබුනෙ නෑ. මාළිඟාවෙ නපුරු මුරකාරයා පොඩි එකාව අල්ල ගත්තා..

"කොහෙද තමුසෙ දුවන්නෙ.. පලයං පලයං එළියට.. දුවපං ගුටි නොකා" මුරකාරයා රකුසු කරගත් මුහුනෙන් කිව්වා.. පොඩි එකා හොඳටම බය උනා.. ඒත් ඒ අතරින් ආපහු නත්තල් සීයගෙ හිනාවෙන මුහුණ පෙනුනා.. පොඩි එකා මුරකාරයගෙ කකුල් දෙක අස්සෙන් වේගයෙන් බඩ ගාගෙන ඇතුලට දිව්වා. නත්තල් සීය දැං පොඩ් එකා ඉස්සරහ.. පොඩි එකා ආසාවෙන් බලං හිටියා.

එතකොටම තමන්ගෙ බෙල්ල අඬුවකට හිර උනා වගේ පොඩි එකාට දැනුනා. හුස්ම ගන්නත් අමාරුයි.. ඒ අර නපුරු මුරකාරයා.. එයා ආපහු ඇවිත් පොඩි එකාගෙ බෙල්ලෙන් ඇඳන් ගියා.. පොඩි එකා නිදහස් වෙලා ආපහු නත්තල් සීයා ගාවට දුවන්න හැදුවත් ඒක හිතන්නවත් බැරි උනා..
නපුරු මුරකාරයා පොඩි එකාව බෙල්ලෙන් ඇඳන් ගිහින් එළියට තල්ලු කරා. වාරු නැති උන පොඩි එකා එතන තිබුණ කූණු කාණුවට වැටුණා.. නත්තල් සීයගෙන් තෑගි ගනිපු අනිත් ළමයි හැමෝම එළියට ඇවිත් හිනා උනා. එයාලට ඒක හරිම විනෝදජනක දෙයක්..

පොඩි එකා අමාරුවෙන් කාණුවෙ බැම්ම උඩින් වාඩි උනා.. තාමත් නත්තල් සීයා Supermarket එක ඇතුලෙ ඉඳන් ඇතුලට එන පොඩි උන්ට තෑගි බෙදනවා.. පොඩි එකා හිස් බැල්මෙන් ඒ දිහා බලන් හිටියා..........