ශ්‍රී බුද්ධවර්ෂ 2535 බක් මස අටවැනිදා මොකද උනේ ?

අවුරුද්දට ගේ අස්කරන වෙලාවෙ මට හරිම පුදුම ලියවිල්ලක් හම්බ උනා.. ගොඩාක් පරණ තල් කොළයක ලියපු සටහනක්.. අපේ සීය ගාව ඉස්සර මෙහෙම ඒව තිබුණා මට ලාවට මතකයි.දකුණු පළාතේ බොහොමයක් තියෙන නිධන් ගැන සටහනක්ද මේ ? මට එකපාරටම මතක් උනේ නිදන් වඳුළු ගැන.. මේකත් එහෙම එකක් උනොත්....................
මං අම්මලටවත් නොපෙන්නා ඒක හංඟ ගත්තා.. නැත්නම් කවදාවත් ඕවට ඉඩ දෙන්නෙ නෑ.

වැඩ ඉවර වෙලා මං කාමරේට ඇවිත් දොර ජනෙල් වැහුවා.. ඊට පස්සෙ පරිස්සමෙන් අර සටහන දිඟ ඇරන් කියවන්න හැදුවා.. ඒත් අමාරුයි.. හරියට බ්‍රාහ්මීය අක්ෂර වගේ.. ඒත් මේක කියෙව්වොත් පරම්පරාවම ගොඩ දාන්න පුළුවන් නිධානායක් ලැබෙන නිසා මං මහන්සිය නොබලා දළ අදහස වෙන් කර ගත්තා..

ඒකෙ පිටිපස්සෙ සිතියමක් වගේ ඇඳලා තිබුණා.. ඒකෙ කොටු අටක නිධානෙට යන මං සළකුණු සටහන්ව තිබුණා. තව එක එක අමුතු නම් තිබුණා. මොකක් උනත් මං මේක හොයා ගන්නවා කියන දැඩි අධිෂ්ඨානයෙන් මං ඒක පරිවර්ථනය කරා..

මට වැඩිපුරම ඕන උනේ නිධානෙ ගන්න බහිරවයාට දෙන්න ඕන නර බිල්ල ගැන විස්තරයක් දැන ගන්න.. කොහොම හරි මගේ මහන්සිය අපතෙ ගියේ නෑ..

"ශ්‍රී බුද්ධවර්ෂ 2535 බක් මස අටවැනිදා අරුණාලෝකයත් සමඟ මෙලොව එළිය දුටු , ලෝකයම එළිය කිරීමට හැකි තරම් වූ මහා බලසම්පන්න වාසනා ගුණයකින් යුත්, සියළුම සත්වයින්ගේ චිරස්ථථිය උදෙසා කටයුතු කරන පින්වත් පුත් කුමාරයෙකු........................"

මං බොහොම අමාරුවෙන් ඔය ටික පරිවර්ථනය කරගත්තා විතරයි 'දඩාස් ' ගාලා කාමරේ දොරත් ඇරං අම්මා ඇතුලට ආවා.. මං නිදන් වදුළ හංඟන්න හැදුවත් වැඩක් උනේ නෑ.. දැං නම් ඉතිං නිධාන ගොඩ දානව බොරු .

"ඔය මොකක්ද ඔය කේන්දරේ අරං කරන්නේ ? පොරොන්දම් බලනවද ? ඔන්න ඕක නැති කරන්නෙ නැතුව මෙහෙට දෙනවා "

---

-