අපේ කැරකෙන වෙසක් කූඩුව...

පහුගිය දවස් ටිකේම පෝස්ට් එකක් දාන්න තියා බ්ලොගර් එකවුන්ට් එකට ලොග් වෙන්නවත් බැරි උනෙත් මං හරීම බිසී නිසා මොකද දන්නවද ? අපි හැදුවනෙ කූඩුවක් 
මේක වෙසක් කූඩුවක්.. නිකංම නෙවෙයි අඩි 25ක් උස කැරකෙන කූඩුවක්
ඒත් පොඩි තාක්ෂණික මෙව්ව එකක් නිසා අඩි 25ක් උස උනෙත් නෑ කැරකුනෙත් නෑ ඒත් අවුලක් නෑ කොහොම හරි හැදුවනෙ.. දැං මෙතැන් සිට දිග හැරෙන්නේ ඒ මහා කූඩූ රාජයාගේ උත්පත්ති කතාවයි..

ලංකාව පුරාම හැම ආයතනයකම වගේ වෙසක් උත්සවයට සරසනවනේ. ඉතිං මං ඉගෙන ගන්න එකෙත් ඒක බොහොම ඉහලින් සමරනවා. ඒකට සමඟාමීව වෙසක් කූඩු තරඟෙකුත් පවත්වනව කියපු දවසෙ ඉඳන් ඔන්න අපේ කට්ටිය ෆෝම් උනා.. කොහොම හරි එක වෙන්න.. අපිත් ඉතිං හැදුව කියමුකෝ..

මුල ඉඳලම ප්ලෑන් කරපු විදියට තනිකර කූඩුව හැදෙන්නෙ ස්වාභාවික ද්‍රව්‍ය වලින්. (ඒත් ඒව එක්ක වැඩ කරන්න මෙච්චර අමාරුයි කියල දන්නව නම් පුරුදු සව් කොලෙන්ම අලවනව)

මේක තමයි කූඩුවෙ සැකිල්ල

වටේට ගොක් කොළ වලින් පැදුරක් වගේ වියුවා

අපි නම් දළදා මාළිඟාවෙ අනුරුවක් කියල හිතාගෙන හැදුවෙ. අනිත් අයට මොකක් වගේ පෙනුනද කියල නම් මං දන්නෙ නෑ..

පැටව් කූඩුවක් රෑ කාලයේ

මේ වගේ පරිවාර කූඩු 6ක් තියෙනවා.. මට බාරව තිබුනේ කූඩුව කරකවන වැඩෙයි ලයිට් වැඩ ටිකයි තමයි.. කරුමෙට නොකෙරුණෙත් ඒකමයි..

හරියට වැඩේ උනා නම් සම්පූර්ණ කූඩුවෙ ලයිට් රටා 18ක් දුවනවා. ඒ නිසාමයි සාම්ප්‍රදායික ෆ්ලෑෂර් ක්‍රමේට නොගිහින් සේරම සර්කිට් වලින් හැදුවේ.. (ඔන්න ඔතනයි අපිට වරදින්න පටන් ගැනීමේ මුල)

අපිට කරන්ට් එක දුන්නෙ ආයතනයේ ෆියුස්, ට්‍රිප් ස්වීච් වලට පිටින්. ඒ කියන්නෙ විදුලි මීටරේ ඉඳන් කෙලින්ම එන ලයින් එකෙන්. වැරදිලාවත් කරන්ට් එක වැදුනොත් බේරනව හෝ බේරෙනව නම් බොරු.

අපේ කොල්ලො ටික බොහොම ලස්සනට කූඩුව පද්ද පද්ද කෙසෙල් පිති හයි කරල තියෙන්නෙ.. දන්නෙම නැතුව රේසරේ අස්සෙන් ගියපු වයර් දෙකක සීරීමක් ඇති වෙලා.. කරන්ට් එක දීපු ගමන්...

.... හුචෝස්....

මගේ සතියක මහන්සිය දුමක් වෙලා පාවෙලා ගියා..

කොහොම හරි ඒ කතා වැඩක් නෑ. මට මතක විදියට අනිත් බැජ් වලින් එක්ක කූඩූ 4ක් හෝ 5ක් තරඟෙට තිබුණා. ඒකෙන් එකක් වැස්සට සෝදා පාළුවෙලා ගියා. අනිත් එකේ බෙයාරිං හිර කරන් කරකවා ගන්න බැරිව හිටියා.ඒකක් හොඳට තාමත් වැඩ කරනවා. කොහොම උනත් අවසානයේ පළමු තෑග්ග ඉදිරිපත් කරපු හැම කූඩුවටම සම සමව බෙදල දෙන්න තීරණය කරා.. (ඒක නම් මාරයි. විභාග ලකුණුත් එහෙම කරනව නම්...... )

වැදගත් දේ මේකයි.. අපි හදපු කූඩුව නෙවෙයි. කොල්ලන්ගෙ එකමුතුකම.. කූඩුවෙ වැඩිම බරක් ඇද්දෙ අපේ යාළුව හිරාන්.. එයා ක්‍රිස්තියානි.

  

මේ ඉන්නෙ හිරාන් කූඩුවටම දාල

ඊළඟට ගොඩක් උදව් කරපු එළ කොල්ලො දෙන්නෙක් තමයි ඉම්රාන් සහ බුෆල්ලා..මෙයාල මුස්ලිම්..

මේ ඉම්රාන් නසීර්

ඊළඟට කණක් ඇහෙන්න නැතුව වාද කර කර කූඩුවෙ වෙනස්කම් කරේ ප්‍රමෝද්, රසාංජන, කසුන්.. හපෝ මුං 3 දෙනාට එක මතයකට එන්න බැරි උනාම තියෙන වදයක් අපිට. එකෙක්ට රතු පාට ඕනලු, අනිත් එකාට නිල් වෙන්න ඕනලු, තව එකෙක්ට කොළ ඕනලු. අන්තිමට පාට 3න්ම දාල යන්තම් ඇඟ බේර ගත්තා..

කිසිම භේදයක් නැතිව කොල්ලො හැමෝම එකට වැඩ  කරා.. හැබැයි ඔය අතරෙ රුපියල් 100 ක් දික් කරාම ඔක්කොම හරි කියල හිතන් ඇඟ බේර ගනිපු උනුත් හිටියා. ඒ ගැන කතා නොකර ඉමු.

වැඩ කරපු කොල්ලො හැමෝම බැහැල වැඩ කරේ මේක බැජ් එකේ වැඩක් කියන හැඟීමෙන් විතරයි... මේකෙදි උන රස සිද්ධි නම් කියල ඉවර කරන්න බෑ.. ඊට වඩා ලේසියි ෆොටෝ ඇල්බම් එක දාන එක..

පෝය දවසෙ රෑ නම් නියමෙට සරසල තිබුණා.. මාරම ලස්සනයි..

 

එහෙනම් ඉතිං තවත් ලස්සන අත්දැකීම් ටිකක් ජීවිතේට එකතු කර ගත්තා.. ඒකට පුංචියට හරි උදව් කරපු හැමෝටම ස්තූතියි.. !

(හැබැයි මේ නිසා මේ පාර ගෙදරට කූඩුවක් හදන්න බැරි උනා නිදිමරල කොහේදෝ යන උණකුත් හදා ගත්ත. අවුලක් නෑ.. ඒක තමයි ජීවිතේ කියන්නෙ  

කොල්ලන් කොතනද ආතල් එතැනයි කියනවනේ.. මඩ ටිකක් ගැහුවෙ නැත්නම් අසම්පූර්ණ ගතියක් දැනෙනවා.. ඒ නිසා මේ photo album එකත් බලලම යන්නකෝ...